श्रीदत्त तुम्ही

 श्रीदत्त तुम्ही, त्रिगुणी मूर्ती

अनसूयाउदरी, अवतरती

ब्रम्हा हर आणि, विष्णू रुपा

हे गुरुदेवा, हे अवधूता ।। 

हे स्मितवदना, सुंदरनयना

हे मृदुलकरा, पावनचरणा

शांती स्वरूपा, अद्भुतचरिता

सात्विकरूपा, श्री गुरुदत्ता ।। 

हे दंड कमंडल, कमल धरा

हे अत्रिनंदना, विघ्नहरा

हे अभयकरा, भवतापहरा

हे दत्त दिगंबर, तिमीरहरा ।। 

अवतार तुझा, पतितोद्धारा

स्मरताच मनी, दिसतोची खरा

षड् रिपु रुपीच्या, आक्रमणा

थोपविसी तू, भयमुक्तकरा ।। 

वेदांग तुझ्या, अवतीभवती

ही नम्र धरा, कपिला पुढती

सद्रक्षण हाती, त्रिशूल सदा

हे शंखचक्रधर, नीतवरदा ।। 

तव नाम मुखी, वसुदे सखया

तव रूप नयनी, दिसुदे प्रणया

हृदयी तव मूर्ति, स्थापित ही

श्वासोच्छ्वासी, तव कीर्तनही ।। 

हा प्राण तुझा, हा शब्द तुझा

हा देह तुझा, आनंद तुझा

हा भाव मनीचा, अर्पियला 

श्रीदत्तचरणरज, उद्धरिला ।।

*****श्रीदत्तचरणरज*****