वीटेवरी तू श्रीरंगा

 वीटेवरी तू श्रीरंगा, सभोवती चंद्रभागा,

चरणी घेसी पांडुरंगा, करीशी तू मोहभंगा ।।

नको रुसू नारायणा, धाव घेई रे रक्षणा,

भक्त तुझा दीनवाणा, भाकतसे रे करुणा ।।

भेट देई कडे घेई, नको दूर लोटू आई,

देऊनिया स्तनपाने, तृप्त करी गे विठाई ।।

कोंडूनिया का तू घेसी, काय चुकले सांगसी,

वाट पाहे अनिमिषी, अश्रू वाहे लोचनासी ।।

संताघरी तू नांदसी, पाठी उभा लक्ष देसी,

संत कामी हात देसी, संत मुखे नाम घेसी ।।

पाणी भरी दळण करी, बाग शेतीभाती करी,

संत रूप धरुनी हरी, कष्ट घेसी अंगावरी ।।

अशी माऊली प्रेमळ, धन्य धन्य संत कूळ ,

छेदी अभद्राचे मूळ, उरे नाम ते केवळ ।।

तसे लक्ष देसी आता, तारी तू अनाथनाथा,

दत्तचरणरज प्रार्थी आता, चरणी तुझ्या ठेवी माथा ।।

       *****श्रीदत्तचरणरज*****